بالفيديو : هكدا إلتهمت شاحنة النفايات تاجر السمك بالحسيمة

محسن فكري، (31 عام)، مواطن مغربي بسيط من الحسيمة، كيبيع الحوت و كيعيل بيه أسرة مكوّنة من عشرة د النّاس.

البارح بالليل، مصالح البلدية و البوليس خداو ليه سلعتو كان يالله جابها من المرسى، خمسة طن ديال الحوت من نوع Spada بوسيف حطّ فيها گاع راسمالو، ناضو لاحوها ليه فالكاميو ديال الزبل.

السيّد أمام هول الصدمة، تلاح فالكاميو باش يجبد رزقو و الناس كا تشوف، الشيفور ديال الكاميو سمع أمر من بوليسي (ما بغاش محسن يعطيه رشوة ديال 500 درهم) كيقول ليه #طحن_مّو.


محسن كيف ما كتشوفو، هاهو مطحون مع الحوت ديالو، تْقتل بدم بارد بدون رحمة، و خلاّ عائلة بدون مُعيل.

الشعب فالحسيمة خرج البارح عن بكرة أبيه للشواريع كيحتج و يغوّت و يتضامن مع شهيد الحگرة محسن فكري، ألاف د الناس إعتصموا أمام ولاية الأمن و مندوبية الصيد الليل كامل حتّى جا عامل الإقليم و الوكيل العام للملك مع الثلاثة دالصباح باش يتفاوض معاهوم و يسمع ليهم.

تحية لشعب الريف، تحية للناس دالحسيمة واخا صوّتوا لعميل المخزن العمّاري، و هاد السيّد ما خاصش الموت ديالو تنسا كيف ما تنسا الموت ديال شهيدة الحگرة مّي فتيحة فالقنيطرة.